1Th 5 | NAS | STEP | Niiꞌmaikororiꞌ ee, baruꞌ bateinang poainaꞌmung naurarampiiꞌnaang niaꞌmeriaukaꞌnung diiꞌke.

1 Thessalonians 5

Nerimariri Oꞌnorimaatoaing, Taꞌning-antanaꞌ Pora Tampaꞌ Oomuriainaꞌ

1 Niiꞌmaikororiꞌ ee, baruꞌ bateinang poainaꞌmung naurarampiiꞌnaang niaꞌmeriaukaꞌnung diiꞌke. 2 Aiꞌ diiꞌke tee tampaꞌ noruꞌeri otong Ovoring poainaꞌmung makensiꞌnaꞌmung, bakisipunuka biikaang bateinang-pinaꞌ tenang muunga. 3 Tenang nantoonge aaꞌpai otoko, “Niiꞌ tampaꞌ oꞌnorimaang mooa-koo,” eeꞌnamuꞌ taꞌning-antanaꞌ biikaang otootoꞌ mooa-poꞌnung turariaravaing. Teeꞌ tee-pinaꞌ manikuꞌ pareaavaꞌnaang taꞌning-antanaꞌ sisikeeravoromanaꞌ; baariꞌaavaukaꞌnung. 4 Nka diiꞌ niiꞌmaikororiꞌ mutaanang-kooning deeaꞌ. Teꞌmung doong basiarama taꞌning-antaruriaukaꞌnung bakisipung-pinaꞌ. 5 Diiꞌ ookara tee araka baurukaaꞌ eeꞌnoko doong baurukaaꞌke. Niiꞌ tee mutaanang eeꞌnoko muung-kooning deeaꞌ. 6 Teeꞌkoo enang aatumpiri otoaukaꞌ teing niiꞌning-pinaꞌ, teka tantemariri oꞌnoriai taremariri. 7 Muung tee aasiꞌ bakanang, tenang nantoong naikaama kanuꞌarimanang. 8 Teka niiꞌ nantoong doong-kooning deemariritaaꞌ tee taremariri oꞌnoriaing. Ookara piaavarampiri, Kumponing-etaing kara masikaꞌantavampiri, eeꞌnoko mooꞌmuriainaꞌ aaꞌnaꞌ noruꞌampiri, orara-ita neeꞌmariri oꞌnoriaing naning tavutavuꞌ nko-pinaꞌ bakaang mono neeꞌarapeuꞌnaꞌ mononopaꞌ baakopo dovang ivekeng kurumparama. 9 Aiꞌ Kumponinge tee niiꞌ miruꞌmuriaꞌ teie kiimatamuriiꞌnaang iiravoma, teka domamuriiꞌnaang niikaang Ovoringe, Jiisuuꞌ Karistooꞌke, teie eeꞌnarai niiꞌkoo booꞌparuꞌnunge niiꞌ naroꞌmuriiꞌnaang tee ninka toroaravainaꞌmung-koo, moompiaining eeꞌnoko domamariaining. 11 Tasiꞌperi? Makosi, tampara aarumo nko-koo domang kuaaꞌantareerima otoriaing, eeꞌnoko puring-antareerima teeꞌpinaꞌ nkorarimatomanaꞌ.

Kumponinge Pakumuriaing Tapoꞌmeerira Navumariri Oꞌnoriainaꞌ

12 Niiꞌmaikororiꞌ ee, niiꞌke enang eeꞌ minkurarampimaang: Masikaꞌantavereriaing teing nantoong Ovoring-koo kuunge diiꞌ pakuraarimaing taung nau-antaraarima koong-antaraari. 13 Piaaverereriai, pankaing-antaverereri tee-koo eeꞌnung-koo mintoong-koo nkoaamatomaung-koo. Mooa-koo otoriaing. 14 Niiꞌmaikororiꞌ, eeꞌ nkoveriiꞌnaang botorarampimaang: Koono-antaverereriaing teing kontevoroma ataꞌ nanuꞌnuka, eeꞌnoko teing avoroꞌketa orarunsiarimaing dunsirunsi-antavereriaing. Pakuereriaing teing iriꞌ oparimaing. Bointuri otoriaing ookara ninka. 15 Tauraꞌperiaukaꞌ orara orarai makuꞌkoo, teka paku baukonuka deentariri otoriaing diiꞌ diiꞌka eeꞌnoko ookara-koo. 16 Doturoturariri otorimaatoai. 17 Kunsi-koo uaaroriaukaꞌ. 18 Bane arekeeꞌ nkoarako tampara tamperiaing Kumponing-koo. Teeꞌ eeꞌnaꞌ nkorariiꞌnaang Kumponinge maroruri otong diiꞌ Jiisuuꞌ Karistooꞌkoo otoriko. 19 Tanuaang Meekung siriꞌeriaukaꞌ. 20 Daang tamperiaukaꞌ tee kara Tanuaang Meekunge karanta~, 21 nka paaraveriaing ookara kapooꞌnanka tasiꞌperiainooꞌke basi, eeꞌnoko tenang komperiaing kapooꞌnanka masikeng.

Asiꞌnanaare

22 Pote-antarariri otoriaing teing-eta kapooꞌ orarananka-ita. 23 Teie eeꞌnarai Kumponinge mooa okovosiꞌke meekaꞌantaruriaing, tampaꞌ konturiaing diiꞌ ootukunairue – tanuaang, tunsi, mono – bera Jiisuuꞌ Karistooꞌ poainaꞌmung-koo, koontoꞌ tuumpi otoriaing deentariainaꞌ. 24 Kumponinge bokururuꞌnunge koontoꞌ siꞌduriaukaꞌnung. Teeꞌ minkuansinaꞌ nariꞌ nkoruriaing.

25 Niiꞌmaikororiꞌ ee, kunsi-koo pakumereriai.

26 Diiꞌke teing niiꞌning niiꞌmaikororiꞌ niikaang doturotu nauereriaing bireng batuꞌdeeri Ovoring-koo kuunge.

27 Ninge aaꞌnaꞌ botorampimang, Ovoring bakaang miring-koo kuunge: Deerueriaing aung karavoto~ ootukunung niiꞌmaikororiꞌankoi. 28 Tee biraanke niikaang Ovoring Jiisuuꞌ Karistooꞌ bakaang diiꞌ ninka nariꞌ otomatoaing. Eeꞌ, teeꞌ nariꞌ.